Kavita

ग्रेस

Leave a Comment / September 17, 2024 September 17, 2024

ग्रेस

कधी कधी हे असेच क्षण चिरंतन राहावेत असे वाटते.
एकांती, झाडाच्या बुंध्याला पाठ टेकून बसावे;
हातात ग्रेस असावेत;
आणि समोर आभाळभर पसरलेला सांजरंग….
तोच केशररंग डोळ्यांतून पार रक्तात उतरावा.
मग ग्रेसांची एक एक ओळ घेऊन चित्तडोहामध्ये सखोल बुडून जावे.. खोल…खोल…खोलवर….

=============================

अशाच एका अविट क्षणाची या चित्ताला आस
एकांताला संग द्यावया हातामध्ये ग्रेस
ओळ घेऊनी एक तयाची जावे चित्तीं खोल
मनीं तळाशी उमलून ये दुःखाचे मोहक फूल l
सुई भिजवुनी वेदनेत असल्या दुःखा टोचावी
दुःखाच्या वस्त्रावरची एकेक शिवण उसवावी
करून धागे सर्व मोकळे वाऱ्यावर सोडावे
पाशमुक्तशी अशी नग्नता घेऊन गाणे गावे l
केशररंगी सांज भरे मग रक्तातून विरक्ती
मोहजळाच्या कणाकणातून सुकते बघ आसक्ती
मदिरा भरुनी दुःखाची मग सौख्याच्या पेल्यात
हातामध्ये धरतो माझा कुणी ग्रेस हा हात l

Sanj Nimali

Leave a Comment / February 7, 2024 September 17, 2024

पूर

सांज निमाली, ढग भरले रे, अंधाराला पूर.
अशा अवेळी तुझी आठवण, तुझे श्वास पण दूर !
वादळवारा साहवे न मज, कितीक छळसी तूही ?

हाती आहे तुझीच कविता, दूर तुझा पण सूर !
ये ना लवकर, ये ना सखया, इथे व्याकुळे कोणी
आभाळातून घन भरलेले अन् डोळ्यांतून पाणी
धावत ये तू असा अचानक, कवेत घे ऐसे की,
अंगांगातून भिनेल लय अन् श्वासांमधुनी गाणी ll

घर आवरले आहे तेही विस्कटून जाऊ दे,
ओढीला या ओढ भिडूनी पूर पूर होऊ दे,
सर्वस्वाने तुला समर्पित होइन मीही, सखया,
असा बरस की रोमरोम हा चिंब चिंब न्हाऊ दे ll

– वरदविनायक

Gazal

Leave a Comment / February 7, 2024 September 17, 2024

???? प्रीतीची गझल ????

जुनी वही चाळताना अस्मादिकांनी लिहिलेली एक प्रीतीची गझल काल सापडली, आणि मन टुण्णकन् उडी मारून भूतकाळात फिरून आले.

झाले होते असे की अस्मादिक बारावीत असताना अकरावीत एका नवीन सौंदर्याने प्रवेश घेतला होता.

अस्मादिकांसह अनेकाजण भलतीच balance sheet tally करण्यात गुंतले.

अस्मादिक आणि ते सौंदर्य Badminton च्या एकाच टीममध्ये आल्यावर पहिली भेट झाली आणि त्या दिवशी कॉलेजातून घरी परतताना ट्रेनच्या भर गर्दीत ही एकटाकी गझल सुचली !

(त्यावेळेस मोबाईल तर नव्हतेच, फेसबुकचे पूर्वज ऑर्कुट होते. पुरानी यादें…)

काल कागद सापडला आणि ते दिन आठवले.

गेले ते दिन गेले …. ????????????

==========================

प्रीतीची गझल

तुझ्या तहानेने मी व्याकुळ, तुजवर माझे प्रेम सखे

किती करावी तुझी प्रतीक्षा? चकोर अन् मी सेम सखे!

बंदुका नको, नको सुरे अन् नको तुला ती हत्यारे

अचूकशा त्या कटाक्षातुनी करिसी माझा गेम सखे!

अशा कटाक्षाने मी घायळ, मला वाटते नवल असे –

किती हातखंडा तव त्यावर! कधी न चुकसी नेम सखे!

परी न कळते तुला कधी का किती मला तू आवडसी?

रोजच जाशी समोरुनी, पण कधी न पुससी क्षेम सखे?

कॉलेजातील सगळे चवळे सखये तुजवर मरती गं!

होशील का तू माझी आणिक देशील का मज फेम सखे?

ठरवलेय मी तुला घेईनच करून माझी मी नक्की

तुजवर माझी प्रीती म्हणजे ‘ओनरशिप-इन-रेम’ सखे

सुवर्ण, प्लॅटिनम आणिक तो कोहिनूरही झक् मारेल

तू तर त्यांहून चमचमणारा, लखलखणारा जेम सखे

हवी तेधवा ऑर्कुटावर तुला पाहण्या बघ कालच

खर्चून दोन हजार आणिला इंटरनेट मॉडेम सखे

दिसायला मी बरा, तरीही दीन तुझ्यास्तव मी झालो

तरी सख्या तव मज म्हणती बघ ‘सर्किट आईटेम’ सखे

मनाची न, पण लाज जनाची सोडलीय मी तुजसाठी

माझी होण्या प्रेयसी तुला का वाटे मग शेम सखे?

‘हो’ म्हटलिस तरी वेळेआधी सांगू नकोस तव बापा

त्याला कळले तर भिंतीवर बघशील माझी फ्रेम सखे!

– वरदविनायक

ग्रेस

Sanj Nimali

Gazal

Subscribe Now to Get Regular Updates

Subscribe Now to Get Regular Updates

कोदंड पुनर्वसु

Quick Links

Newsletter

Kavita

Subscribe Now to Get Regular Updates

Subscribe Now to Get Regular Updates

कोदंड पुनर्वसु

Quick Links

Newsletter

Complete Your Details

Scan to Pay